Condolence – Smt. Santosh Khajuria

0
409

शरधांजलि

एह् बड़ी दुखद सूचना ऐ जे डोगरी संस्था जम्मू दे पूर्व प्रधान(1955-1957) सुर्गवासी श्रीनिवास शाह हुंदी सपुत्तरी ते डोगरी दी मन्नी-परमन्नी दी कवित्री श्रीमति संतोष खजूरिया होर कल्ल इस दुनिया चा साढ़े कोला खिंडी गेइयां ।

संतोष खजूरिया हुंदा जनम 22 मार्च, 1933 गी होआ। घरै च साहित्यक म्हौल होने दे कारण इ’नें अपने कालेज दे दिनें च गै कविता रचना शुरू कीता ते पैह्‌ली कविता “सौन” शीर्शक कन्नै लिखियै डोगरी कवियें दी बरादरी च शामल होइयां । सन् 1953 च बी.ए. कीती ही । इ’यां पंजाहें दे द्हाके च इ’नें अपना साहित्यक सफर शुरू कीता जेह्‌ड़ा किश ब’रे पैह्‌ले तगर सक्रिय रूप कन्नै जारी रेहा। इं’दे त्रै कविता-संग्रैह्—त्रिचौली, भोले-भाव ते बदलोंदियां ब्हारां डोगरी कविता साहित्य दियां अनमुल्लियां रचनां न । इं’दियें कविताएं च प्रकृति चित्रण, शंगार, नारी मनै दी वेदना बगैरा ते सरल-सादी ठेठ डोगरी भाशा इं’दी लेखनी दी पन्छान न ।

डोगरी दी इक सुलझी दी ते शालीन शख़्सियत दी मालक कवित्री, श्रीमति संतोष खजूरिया हुंदे निक्खड़ी जाने पर डोगरी भाशा ते डोगरी संस्था जम्मू गी जो घाटा होआ ऐ, उसदी कोई पूर्ति नेईं है। बेशक भविक्ख च एह् साढ़े च नेईं लभङन, पर डोगरी साहित्य दे खेतर च इं’दे अनमुल्ले योगदान कारण इ’नेंगी म्हेशा चेतै कीता जाह्‌ग ।

अस सब इस दुख दी घड़ी च इं’दे परिवार कन्नै शामल आं । अस सब परम पिता परमात्मा अग्गें प्रार्थना करने आं जे संतोष खजूरिया हुंदी दिवंगत आत्मा गी शांति प्रदान करन ते इस सदमे गी बर्दाश्त करने आस्तै इं’दे परिवार-जनें गी हिम्मत देन ।

शत-शत नमन।

ॐ शांति ।

Previous articleDadi Te Maan
Next articleBalidaan
Shashi Pathania
Born in July, 1955, Prof. Shashi Pathania is an academically experienced individual with a doctorate in Dogri (Dogri Verb), serving through various positions (including H.O.D.) within the Department of Dogri (Jammu University) retired as Professor in Dogri. She started writing in Dogri in the year 1984 and has written prolifically in various genres of Dogri including short story and poetry and has been Co-guide a scholar at Ph.D. level for making Machine translation tool. She has been conferred Sahitya Akademi Translation Award for the year 2012 in Dogri.

LEAVE A REPLY

Please enter your comment!
Please enter your name here